Die Gstraifte - Zeddel 2019

lang und länger wird ihre Ruggstand uf dr Pischte
kurz und kürzer - dr Wäg ind Ehe-Kischte
es liggt andr Ernährig ihre Ruggstand uf de Schii
Sie nascht nimm Ragusa, - nei Beeri mit Raahmi

Es Grücht gooht durch d’Stadt - wie dr Wind
s’Orang Utan Baby isch e Gugguggskind
Was mi dodrbyy nid in Rueh tuet loh
Wie het dä Voogel kenne in das Keefig inekoh

s’Rollaator Röösli fluecht “gopfverdammi i wird bewacht”
uff Schritt und Tritt verfolgt me sie an däre Fasnacht
ischs en Änggeltriggbetriieger - uf dreischter Mission
Nei es handelt sich ume n’ IV - Spion

Dangg em Videobewiis kah sich dr Schiiri d’Freiheit näh
sich die beschte Szene in Ziitlupe nomol gääh
Als Schiri würd ich e Quadrat in Himmel schiebe
kumm mir gniesse nomol - wie d’Schwoobe usefliege

dr Nochbr uf mim Parggplatz im YB Trikot
i wünscht dä Drottel - dä wär anderswo
i schtegg’n ins 3er Trämmli - bis zer Ändstation
deert wird är verhaftet als Gillet Jaune

d’Negro-Rhygass deerfe ihr - Emblem nimme traage
in ei zwei Joohr muesch em Waggis “Elsässer” saage
D Martulla Blocher tuesch - das kenne mir usrächne
gli als “Sex-Neutrales - Säugetier” aspräche

Spände au Sie es Batzeli - in unser Spaarschwein
Mir sammle Gäld fiir dä Ziircher Fuessball-Verein
Fiirs Trainingslager - hän mir Thailand usgsuecht
und obedryy e Tour in sone Höhli ine buecht

Die Schtinggkäfer bitte zu Tode tiefgfriere
Nid zerdrugge sunscht tuet ihre Gschtank eskaliere
doch luege sie genau bi däm Typus do
bi däm würd ich lieber - uf Nummer sicher go

dRegierig rieft us - dr Klimanotstand
statt so wiit fliiege soll me zBasel jetzt an Strand
ökologisch tuet bereits dr Baschi Dürr vorgoh
dä kauft Autis - wo numme deerfe umestoh
dr Wessels freuts äär schickt e Brief mit "Love and Peace"
do Baschi d’Parkkarte zum doppelte Priiis

trotz Eehr und Ruhm dr Vogelgryff moniert
ab de Zunft-Vorschrifte isch är fruschtiert
s Glaaibasel kah är uff Läbzyyt nid verloh
no nie het e Frau untr si Koschtym dörfe ko
är meecht au mol us dr Reihe tanze
wie ne Voogel frei deerfe umenanderschwanze
d’Fädere rasiere - d’Fliigel tätowiere
odr au mol nur mit ere Geschte provoziere
dr Vogelgryff isch niidisch und schwäbt in Fantasie
er meecht doch au emol so ne Doppeladler sii